by Pino Cariati
Tu duormi, bella, ‘nta ‘su liettu ed iu sugnu cca fora
Sapissi cchi friddu ca tiegnu ‘nta lu cori
‘nu friddu ca nissunu fuocu ormai fa cchiù passari
Si’ sulu tu la jamma ca mi po’ sanari
Chisà cchi sta faciennu tu, dinta ‘su liettu sula
Forsi mo’ sta’ durmiennu opuri la menti ti vula
Vulissi (d)essi lla ccu tia ppi ti puti’ spiari
Ppi vidi si mi piensi o puri nun mi vu’ pinsari
Risbigliati, ohji bella mia, e affacciati cca fora
Ca si t’affacci tu la notti si fa’ chiara
Puri li petri di la via si mintinu a cantari
Mi fanu coru a mia ppi ti fa’ ‘nnamurari
Chisà cchi sta faciennu tu, dinta ‘su liettu sula
Forsi mo’ sta’ durmiennu o puri cu ra menti vuli
Vulissi (d)essi lla ccu tia ppi ti puti’ spiari
Ppi vidi si ti mancu o puri nun mi vu’ pinsari
‘na luci a ‘sa finestra s’è appicciata chianu chianu
Chiss’è l’amuri miu ca nun sa’ sta’ luntana
‘na luci ca nissuna stilla ‘n cielu po’ aggualari
E s’è appicciata ccà ppi mi fa’ ‘nnamurari
Guardatila, mo’, quant’è bella la guagliuna mia
Illa è vinuta a nasci cca ppi ni fa cumpagnia
Ppi affruntari assiemi li misteri di lu mari
Li cosi belli e brutti ca ‘sa vita ni vo’ dari.